ចាប់តាំងពីនៅឆ្នាំ១៩៩៣ កម្ពុជាបានរៀបចំឲ្យមានការបោះឆ្នោតលើកទីមួយដែលបានជួយពី អាជ្ញាធរអន្តរកាលអង្គការសហប្រជាជាតិ ហៅកាត់ថាអ៊ុនតាក់ ដែលកើតក្រោយទីបញ្ចប់នៃសង្គ្រាមនៅកម្ពុជា បើយើងរាប់អ្នកនយោបាយទាំងចាស់ទាំងថ្មីដែលមានប្រជាប្រិយភាពមកទល់ពេលនេះ គឺមានមិនលើសពី១០រូបផង។ អ្នកនយោបាយចាស់ៗជាពិសេសគេសំដៅទៅលើប្រធានគណបក្សប្រឆាំងដែលជាតំណាងឆន្ទះរបស់ប្រជាពលរដ្ឋមួយចំនួនធំក្នុងបំណង់ចង់ផ្លាស់ប្តូរមេដឹកនាំនៅកម្ពុជា ថាតើអ្នកនយោបាយទាំងនោះបានប្រើវិធីសាស្ត្រអ្វី ទើបធ្វើអោយពួកគេតែងតែទទួលបរាជ័យក្នុងដំណើរការនៃការបោះឆ្នោតគ្រប់អាណិត្តដើម្បីឈានដល់ការផ្លាស់ប្តូរសង្គមកម្ពុជា?
បើនិយាយពីគណបក្សហ្វុនស៊ីបិចដែលដឹកនាំដោយព្រះអង្គម្ចាស់នរោត្តម រណឬទ្ធិតាំងពីអាណិត្តទី១នៃរដ្ឋសភាកម្ពុជាធ្លាប់បានទទួលការគាំទ្រពីប្រជាពលរដ្ឋយ៉ាងភ្លូកទឹកភ្លូកដី និងឆ្លងដំណាក់កាលជាច្រើនមកទល់បច្ចុប្បន្ននៅតែមិនទាន់បានឈ្នះឆ្នោតម្តងទៀតឡើយ បើសំលឹងមើលមូលហេតុដែលនាំអោយប្រជាពលរដ្ឋគាំទ្រគណបក្សដល់ចាស់ជរាមួយនេះ គឺមកពីប្រជានុរាស្ត្រខ្មែរយល់ឃើញថាមានតែខ្សែព្រះរាជវង្ស ជាកូនស្តេចរាជាទើបអាចដឹកនាំ នរគខ្មែរបាន និងមានការទុកចិត្តពីនយោបាយអតីតកាលក្រោមព្រះរាជកិច្ចដឹកនាំព្រះនរោត្តម សីហនុ នាពេលកន្លងមកផង។មិនមែនជាសារនយោបាយ ដែលផ្តល់ជូនដល់ប្រជារាស្ត្រ តែជាការសន្យា និងប្រជាប្រិយភាពពីអាទិទេពទើបបណ្តាលអោយមានការគាំទ្រពីប្រជាពលរដ្ឋជាប់អសនះក្នុងសភាជាតិ។ កើត ចាស់ ឈឺ ស្លាប់ជាវដ្ដដាក់របស់ជីវិតនយោបាយគណបក្សហ៊ុ្វនស៊ីបិចមួយនេះ ជាពិសេសបច្ចុប្បន្នវាហាក់បីដូចជាហួសសម័យទៅហើយក្នុងការថ្លែងសារនយោបាយតាមបែបរឿងរាជាធិបតេយ្យបែបនេះ។
ងាកទៅមើលគណបក្សកាន់អំណាចដឹកនាំដោយលោកនាយករដ្ឋមន្ត្រីហ៊ុន សែនវិញស្បែកជើងដែលគណបក្សនេះតែងតែប្រើដើម្បីដើរនៅលើផ្លូវនយោបាយកម្ពុជានោះ ហើយតែងតែទទួលបានជោគជ័យគ្រប់អាណិត្តគឺសមត្ថផលនានា ស្ពាន ថ្នល់ សាលារៀន ជាក់ស្តែងធ្វើអោយប្រជាពលរដ្ឋអាចមើលឃើញនិងប្រើប្រាស់បាន ជាពិសេសរបស់ទិព្វគឺជាអំណោយផ្តល់ជាបន្តរបន្ទាប់ជូនពលរដ្ឋក្រីក្ររ ជាងការសន្យាខ្យល់ ប៉ុន្តែក៏មានពលរដ្ឋមិនតិចដែរដែលបានមើលឃើញភាព អសន្តិសុខ អំពើអយុត្តិធម៌សង្គម និងជំងឺសង្គមជាច្រើនទៀត នៅតែមិនអាចទទួលយកបាននូវការដឹកនាំតាមរបៀបរបបបែបនេះ។
ក្តីបំណងរបស់ប្រជាពលរដ្ឋដែលតំណាងអោយបក្សប្រឆាំងគឺគណបក្ស សម រង្ស៊ី បន្ទាប់ពីគណបក្សអស់ក្តីសង្ឃឹមហ៊្វុនស៊ីបិចមក គណបក្សនេះហាក់បីដូចជានៅក្រិនមិនលូតទៅមុខបានក្នុងអាណិត្តទី៤ ក្តីទុកចិត្តរបស់ពលរដ្ឋខ្មែរដែលលើកឡើងថាមានតែគណបក្សសម រង្ស៊ីទេទើបអាចដោះស្រាយបាននោះ ដោយសារតែលោកសម រង្ស៊ីប្រើការសន្យា និងធ្វើអោយខុសពីរដ្ឋាភិបាលសព្វថ្ងៃ មិនពុករលួយ មិនកាប់បំផ្លាញព្រៃឈើ ដេញជនអន្តោប្រវេសន៍ គឺអាចទាញបានត្រឹមតែប្រជាពលរដ្ឋដែលស្អប់រដ្ឋាភិបាលប៉ុណ្ណោះ ស្បែកជើងមួយនេះបានធ្វើអោយសម្លេងគាំទ្រមិនគ្រប់គ្រាន់ឡើយ ដោយហេតុ ប្រជាពលរដ្ឋដែលស្អប់រដ្ឋាភិបាលសព្វថ្ងៃមិនដល់កំរិតគ្រប់គ្រាន់៥០ភាគរយបូក១នៅឡើយទេ លោកសម រង្ស៊ីក៏ប្រើស្បែកជើងមួយជំហៀងបន្ថែមទៀត គឺបំផ្លើសបំផ្លោង បំភ័យពលរដ្ឋខ្មែរដូចការលើកពីបញ្ហាព្រំដែន បើមិនបោះឆ្នោតអោយគណបក្សសម រង្ស៊ីឈ្នះក្នុងអាណិត្តនេះទេ គឺប្រទេសកម្ពុជានឹងត្រូវរលាយក្រោមការលេបត្របាក់ពីប្រទេសវៀតណាម។ ការពិតវាគ្រាន់តែវិធីទាញយកសម្លេងឆ្នោតបន្ថែមពីអ្នកគាំទ្រគណបក្សកាន់អំណាចប៉ុណ្ណោះ ប៉ុន្តែស្បែកជើងមួយនេះហាក់បីដូចជាគ្មានប្រសិទ្ធភាពសោះ។
ពីមួយអាណិត្តទៅមួយអាណិត្តទាំងរដ្ឋាភិបាលដែលដឹកនាំដោយគណបក្សប្រជាជន ទាំងគណបក្សប្រឆាំងដែលដឹកនាំដោយលោក សម រង្ស៊ី គឺកាន់តែមានវ័យចំណាស់រៀងៗខ្លួនទៅហើយ ប៉ុន្តែគណបក្សទាំង២នៅតែរក្សាតំណែងរបស់ខ្លួនដដែល។ អាណិត្តទី៤នៃការបោះឆ្នោតជាតិ គេបានមើលឃើញគណបក្សនយោបាយថ្មីមួយទៀត ដែលកើតចេញពីអង្គការសង្គមស៊ីវីលគឺគណបក្សសទ្ធិមនុស្សរបស់លោកកឹម សុខា ដែលលោកធ្លាប់និយាយថាលោកមិនបង្កើតគណបក្សនយោបាយដាច់ខាត ប៉ុន្តែដោយសារប្រជាពលរដ្ឋបាត់ទំនុកចិត្តពីគណបក្សប្រឆាំងចាស់គឺ គណបក្សសម រង្ស៊ី ទើបលោកបង្កើតគណបក្សសិទ្ធិមនុស្សនេះឡើង។ ប្រជាពលរដ្ឋមួយចំនួនយល់ថាប្រហែលគណបក្សថ្មីនេះប្រហែលមានវិធីសាស្ត្រអី្វថ្មីហើយក្នុងការឈ្នះឆ្នោតនៅអាណិត្តទី៤នេះ។ ជាសំនួរនិងចំលើយបានមកពីប្រជាពលរដ្ឋនៅខេត្តព្រៃវែង ឈ្នោះ កែវ ដានី ភេទប្រុស អាយុ៣៥ឆ្នាំ ជាកសិករលោកបានថ្លែងថា នឹកឃើញថាកាលពីពេលនោះលោកទើបតែមកធ្វើកម្មករសំណង់នៅរាជធានីភ្នំពេញបាន២ខែប៉ុណ្ណោះ លោកឃើញការឃោសនារបស់គណបក្សសិទ្ធិមនុស្ស គឺពិតជាខុសពីគណបក្សសម រង្ស៊ីមែន គឺមានគោលនយោបាយអោយលុយចាស់ៗ៤មឺនរៀល និងអោយគោ ១០០ក្បាលមកចិញ្ចឹមក្នុង១គ្រួសារ ជាពិសេសភាពពូកែរនិយាយរបស់ លោកកឹម សុខា។ បន្ទាប់ពីលទ្ធផលបោះឆ្នោតគណបក្សនេះទទួលបានតែ៣កៅអី លោកដានី បែរជាយល់ឃើញថា វាគ្រាន់តែជាល្បិចរបស់អ្នកនយោបាយប៉ុណ្ណោះដើម្បីបានសន្លឹកឆ្នោតពីពួកគាត់ ទៅវិញ។ គាត់ដឹងដែលថាលោកកឹម សុខា ពូកែរនិយាយរហូតត្រង់ចំណុចខ្លះលោកដឹងថា វាមិនមែនជាការពិតទេ តែប្រហែលវាជាវិធីសាស្រ្តនយោបាយហើយមើលទៅ។
ស្បែកជើងដែលអាចអោយលោក កឹម សុខានៅឈរជើងបាននៅទីលាននយោបាយកម្ពុជានិងហ៊ានបើកគណបក្សថ្មីនោះគឺ លោកអាចរកវិធីថ្មីៗដើម្បីសន្យាជូនប្រជាពលរដ្ឋអោយបានច្រើនជាងលោកសម រង្ស៊ី និងការនិយាយពីបញ្ហា ហើយបំភ័យប្រជាពលរដ្ឋអោយបានច្រើនជាងលោកសម រង្ស៊ី។
គណបក្សថ្មីថ្មោងនៅតែបន្តរបង្កើតទៀតព្រោះប្រហែលជានៅមិនទាន់ឃើញមានគណបក្សណា អាចផ្តួលដៃគូរម្ខាងទៀតគឺគណបក្សប្រជាជននេះហើយ ដែលជាហេតុផលអោយពួកគេបង្កើតថ្មីនោះ នៅអាណិត្តទី៥នេះបើសិនជា គណបក្សប្រឆាំងទាំង២ទាំង៣នោះនៅតែប្រើវិធីសាស្ត្រដដែល នោះមុខជាធ្វើអោយបរាជ័យទៀតហើយ ជាពិសេសបើមិនមានការបង្រួបបង្រួមគ្នានោះទេ។ ប៉ុន្តែអ្វីដែលប្រជាពលរដ្ឋមិនបានពិចារណានោះគឺ បើទោះមានការរួបរួមគ្នារវាងគណបក្សសម រង្ស៊ី និងបក្សសិទ្ធិមនុស្សក្តី វាគ្រាន់តែជារូបរាងនៃការរួបរួមប៉ុណ្ណោះ តែអ្វីទៅជាស្បែកជើងថ្មីសំរាប់គណបក្សមួយ១នេះ ស្បែកជើងចាស់ដែលគណបក្សនិមួយៗធ្លាប់យកមកប្រើនៅទីលានដែលធ្លាប់ចាញ់ជាច្រើនដងនោះ បែរជារើសយកមកប្រើដដែលក្នុងគណបក្សរូបរាងថ្មីមួយនេះទៅវិញ វាប្រាកដជាចុងក្រោយ លទ្ធផលនឹងទទួលបានដូចមុនមិនខាន។
វាមិនខុសអ្វីពីការវិភាគក្រោមការគិតយ៉ាងល្អិតល្អន់នោះទេ គឺចុងក្រោយនៃបរិបថនយោបាយខ្មែរ ប្រជាពលរដ្ឋស្រែកច្រៀងសារជាថ្មីម្តងទៀតគឺអស់សង្ឃឹមពីគណបក្សសង្គ្រោះជាតិដែលកើតចេញពីការបង្រួបបង្រួមគ្នានោះធ្វើអោយប្រជាពលរដ្ឋខ្មែរបាត់បង់ការទំនុកចិត្តធំជាងមុនការរួបរួមទៅទៀត ។
ចុះបើពលរដ្ឋគាត់ចង់ងាកសំលឹងមើលរកគណបក្សនយោបាយផ្សេងទៀតក្រៅពីគណបក្សសង្គ្រោះជាតិដែលពួកគាត់អស់ចិត្តទៅហើយនោះ តើនៅមានគណបក្សដែលបង្កើតថ្មីបន្ទាប់ពីគណបក្សប្រឆាំងមុនៗដែរឬទេ? បើមើលទៅស្ថានភាពបច្ចុប្បន្នគេនៅមើលឃើញថា គណបក្សនយោបាយខ្លះទៀតដែលកំពុងតែសកម្មនៅលើបណ្តាញសង្គមហ្វេសបុក និងនៅតាមសារព័ត៌មានជាតិនានា តួយ៉ាងដូចជា៖ គណបក្សសម្ព័ន្ធដើម្បីប្រជាធិបតេយ្យ គណបក្សអំណាចខ្មែរ គណបក្សមូលដ្ឋាន គណបក្សសំបុកឃ្មុំសង្គមប្រជាធិបតេយ្យ និងនៅមានគណបក្សជាច្រើនទៀតប្រមាណជា៥០គណបក្ស ប៉ុន្តែគណបក្សដែលមានសកម្មភាពគឺមានតែ៣.៤គណបក្សប៉ុណ្ណោះ។ អ្វីដែលជាសំនួរដូចគណបក្សប្រឆាំងមុនៗនោះគឺ តើគណបក្សដែលបង្កើតថ្មីទាំងនេះមានវិធីសាស្រ្តអ្វី សំរាប់ដើរនៅលើទីលាននយោបាយកម្ពុជាក្នុងការឈានដល់ការឈ្នះគណបក្សប្រជាជនកម្ពុជាដែលជាម្ចាស់ពានគ្មានគូរប្រកួតមួយនេះ?
បើពិនិត្យមើលគណបក្សសម្ព័ន្ធដើម្បីប្រជាធិបតេយ្យដែលមានលោកខឹម វាសនាជាប្រធានបានធ្វើសកម្មភាពឥតឈប់ឈរនៅលើបណ្តាលវិទ្យុនានានៅកម្ពុជាប្រមាណជាង២០ម៉ោងក្នុងមួយថ្ងៃបើយោងតាមការថ្លែងរបស់លោកខឹម វាសនាតាមវិទ្យុជាតិ និងជាពិសេសសកម្មភាពនៅលើបណ្តាញសង្គមហ្វេសបុក ស្ទើរនិយាយថាអ្នកនិយមលែងបណ្តាញសង្គមមួយនេះនរណាក៏បានស្គាល់លោក ខឹម វាសនា ឬគណបក្ស LDP ដែរ ទាំងនៅលើសង្គមហ្វេសបុក និងក្នុងសង្គមរស់នៅសារនយោបាយដែលពលរដ្ឋទូទៅបានដឹងគឺថាគណបក្សនេះមាន យន្តការ៨ចំណុចក្នុងដឹកនាំរដ្ឋ។ លោក ជា ចន្ថា ជាអ្នករត់ម៉ូឌុបនៅម្តុំផ្សារធំថ្មីមានវ័យប្រមាណ៤៧ឆ្នាំ បាននិយាយថាលោកស្គាល់គណបក្សនេះតាមរយះការស្តាប់វិទ្យុមួយនៅភ្នំពេញ និងបានចាប់អារម្មណ៍សំលេងព្រះធម៌ដែលផ្សាយចេញពីនាទីរបស់គណបក្សនេះទៅវិញ។ ងាកទៅក្នុងបណ្តាញសង្គមហ្វេសបុក យើងឃើញថាអ្នកគាំទ្រគណបក្សនេះបានឃោសនាចែកចាយសារជាសម្លេង និងរូបភាពជាច្រើនដែលមានខ្លឹមសារទាក់ទងនិងព្រឹត្តិការណ៍សង្គម និងបានប្រើសំដីរិះគន់យ៉ាងខ្លាំងៗចំពោះគណបក្សសង្គ្រោះជាតិ ទោះបីជាអ្នកលេងភាគច្រើននៅមិនទាន់ទទួលយកគណបក្សនេះក៏ដោយ ក៏ពួកគេបានដឹងរួចហើយថាគណបក្សមួយនេះមិនគាំទ្រគណបក្សកាន់រដ្ឋាភិបាល និងគណបក្សប្រឆាំងឡើយ។
បើនិយាយដល់គណបក្សដែលទើបតែបានទទួលស្គាល់ពីក្រសួងមហាផ្ទៃវិញគឺគណបក្សអំណាចខ្មែរ ដែលដឹកនាំដោយលោក សួន សេរីរដ្ឋា គណបក្សនេះនៅមិនទាន់មានសកម្មភាពអ្វីនៅលើទីលាននយោបាយស្រុកខ្មែរនៅឡើយទេ ឬជាហេតុផលដោយសារតែបក្សនេះទើបតែបង្កើត តែបើមើលក្នុងបណ្តាញសង្គមហ្វេសបុកវិញ យើងឃើញគណបក្សនេះមានសកម្មភាពខ្លះដែរ ដូចជាការបង្ហាញពីរូបភាពវីដេអូ ប្រជាពលរដ្ឋរងគ្រោះដោយអំពើអយុត្តិធម៌ពីសំណាក់រដ្ឋាភិបាលហ៊ុន សែន តែវាហាក់បីដូចជាគណបក្សនេះមិនទាន់រៀបចំខ្លួននៅឡើយអំពីសារនយោបាយរបស់ខ្លួន។
ចំណែកគណបក្សមូលដ្ឋានរបស់លោកកែម ឡី វិញ គឺក្រោយពីក្លាយជាខ្យល់កន្ទាក់មួយសន្ទុះមកបន្ទាប់ពីមើលឃើញអ្នកគាំទ្រគណបក្សសង្គ្រោះជាតិអស់សង្ឃឹមនោះ ក៏ធ្វើអោយគណបក្សដែលមិនទាន់មានរូបរាងនេះមានសកម្មភាពអ្វីពិសេសនៅតាមមូលដ្ឋាននៅឡើយទេ។ បើមើលបណ្តាលប្រព័ន្ធផ្សព្វផ្សាយនានាកាសែត សារព័ត៌មានល្បីៗ គេមិនបានឃើញរូបរាងគណបក្សនេះទេ គឺបែរជាឃើញតែលោកកែម ឡី ដើរតួជាអ្នកវិភាគព្រឹត្តិការណ៍នយោបាយទៅវិញ។បន្ទាប់ពីស្ងាត់ពីគណបក្សលោកកែម ឡី គេក៏បានមើលឃើញការកំរើកឡើងវិញនៅគណបក្សដែលបានស្លាប់ម្តងរួចមកហើយនោះគឺគណបក្សសំបុកឃ្មុំសង្គមប្រជាធិបតេយ្យរបស់លោក ម៉ម សូណង់ដូរ ប្រធានវិទ្យុសំបុកឃ្មុំ និងជាអតីតប្រធានសមាគមន៍អ្នកប្រជាធិបតេយ្យ។ដោយសារតែលោក ម៉ម សូណង់ដូរមានវិទ្យុផ្ទាល់ខ្លួន បើទោះគណបក្សនេះមិនទាន់បានបង្កើតចេញជារូបរាងនិងទទួលស្គាល់ពីក្រសួងមហាផ្ទៃក្តីក៏គណបក្សនេះបានធ្វើការឃោសនាខ្លាំងណាស់ដែរ នៅលើវិទ្យុរបស់ខ្លួនអំពីគោលនយោបាយជាង២០ចំណុច ដើម្បីអោយពលរដ្ឋទទួលបានព័ត៌មានពីគណបក្សនេះមុនពេលបោះឆ្នោតឈានមកដល់ ប្រហែលការផ្សព្វផ្សាយទាំងនេះហើយជាទ្រនាប់ជើងរបស់លោកម៉ម សូណង់ដូរនោះ ឬមិនទាន់ដឹងថានៅមានសកម្មភាពអ្វីជាងនេះនោះទេ។ ប៉ុន្តែគួររំលឹកផងដែលថាលោក ម៉ម សូណង់ដូរគឺជាអតីតអ្នកគាំទ្រគណបក្សសង្គ្រោះជាតិ ដែលលោកតែងតែយកចិត្តទុកដាក់អំពីបញ្ហាជាតិ ជាពិសេសហ៊ានរិះគន់មេដឹកនាំគណបក្សសង្គ្រោះជាតិបន្ទាប់ពីគណបក្សសង្គ្រោះជាតិសំរេចចិត្តចូលសភារ ដែលពួកធ្លាប់ចោទថាជាសភារចោរមិនគ្រប់ទឹក។
No comments:
Post a Comment